पुणे : कात्रज-कोंढवा बाह्यवळण मार्गावर वडाचीवाडी परिसरात असलेल्या गावठी दारू तयार करणाऱ्या भट्टीवर काळेपडळ पाेलिसांनी छापा टाकला. या कारवाईत गावठी दारू तयार करण्यासाठी लागणारे १२ हजार लिटर रसायन, चार हजार ३४० लिटर गावठी दारू असा नऊ लाख २७ हजार रुपयांचा मुद्देमाल जप्त करण्यात आला. याप्रकरणी पोलिसांनी दोघांना अटक केली.
जगदीश भैरूलाल प्रजापती (वय २४, रा. काळेपडळ), गुलाब संपकाळ रचपूत (वय ३३, रा. होळकरवाडी) अशी अटक करण्यात आलेल्यांची नावे आहेत. त्यांच्याविरुद्ध कोंढवा पोलीस ठाण्यात गुन्हा दाखल करण्यात आला आहे. काळेपडळ पोलीस ठाण्याचे पथक वडाची वाडी परिसरात गस्त घालत होते. वडाचीवाडी येथील ओढ्याजवळ दोघे जण गावठी हातभट्टी दारू तयार करत असल्याची माहिती तपास पथकाला मिळाली. पोलिसांच्या पथकाने तेथे छापा टाकला. आरोपी प्रजापती, रजपुत यांना ताब्यात घेतले. पोलिसांनी गावठी दारू भरलेले १२४ कॅन आणि १२ हजार लिटर कच्चे रसायन, दोन मोबाइल संच असा ९ लाख २७ हजारांचा मुद्देमाल जप्त केला.
